അവലോകനം
ജര ഭവിച്ചൊരുനാള്‍
വികൃതമായി മാറുമീ
അഴകിന്റെ അഴകായി
തുളുമ്പുന്ന സൌന്ദര്യം !
ക്ഷമയെ ക്ഷയിപ്പിക്കാന്‍
ക്ഷണമായി വരുന്നു
അടങ്ങാത്തൊരു മോഹവും
അതിലേറെ ആശയും !
വസന്തങ്ങള്‍ പൂത്തുലയുമീ
ജീവിതത്തിന്‍ പൂമുഖത്തു
പ്രാണനെടുക്കാനായെത്തുന്നു
മൃത്യുവിന്റെ കരങ്ങള്‍ !
ദാനം ചെയ്തു നേടിയൊരീ
ക്ഷേമമാം ധര്‍മ്മനിഷ്ഠയെ
സംഹരിക്കുവാന്‍ മുളക്കുന്നു
അസൂയയുടെ വിത്തുകള്‍ !
കോപം കൊണ്ടു കാട്ടുന്ന
ചേഷ്ടകളില്‍ നശിക്കുന്നു
സകല ഗുണങ്ങളുടെ
സമ്പത്തും ഐശ്വര്യവും !
തങ്ക മനസ്സുകള്‍ക്കു ക്ലാവു പിടിച്ചു
സല്‍സ്വഭാവത്തിന്റെ
മാറ്റു കുറക്കുവാന്‍ ഹേതുവാകുന്നു
ദുര്‍ജനസംസര്‍ഗം !
സ്വന്തം മറയാക്കി
ബന്ധം പുലര്‍ത്തുവാന്‍
ലഞ്ജയില്ലാതെ തെളിക്കും
കാമം നുരയുന്ന മനോരഥങ്ങള്‍ !
ധര്‍മ്മം വെടിയുമ്പോള്‍
കര്‍മ്മഫലം അധര്‍മ്മമാകുന്നു
ക്ഷമയില്ലാതൊരു അഭിമാനം
കുടുംബത്തിനെ കുളം തോണ്ടുന്നു !
